احنا شباب تونس، انتخبناكم، وانتوما اليوم تمثلونا في المجلس التأسيسي، نحبوا نعرفوا فاش قاعدين تكتبوا، قبل ما تصادقوا عليه مش امبعد يجينا قطوس في شكارة ! وعلى خاطر عندنا الثقة فيكم، وعندنا الثقة الي انتوما زادا ماعادش تحبوا سياسة الغمان، ماذابينا اليوم النواب الكل تصوتوا لسياسة حل اللعب ولّي ماعندو مايخبي يحل اللعب. #7ell

فما ناس تحب تفهم شنية حكاية “حل”. حِلْ هي حملة للتعريف بال OpenGov وهي مبادرة مدنيّة تبنّاوها بعض الأعضاء من المجلس الوطني التأسيسي. المبادرة هاذي تحبّ تكرّس مبدأ الشّفافيّة في الدّستور التّونسي و تدخل آليات الحوكمة المفتوحة في إصلاح الإدارة. نطمحو إنّو الصّحافة و المواطنين التّوانسة ينجّمو يتبّعو عمل اللّجان في المجلس الوطني التّأسيسي و يتفاعلو معاه بطريقة مباشرة كيفما تفاعلو مع الثورة ولاّ الأحداث إلّي صارت في تونس عام 2011. من أهدافنا زادة نشر محاضر و تقارير اللّجان للنّاس الكلّ. التّونسي اليوم عندو الحقّ باش يعرف كيفاش النوّاب إلّي إنتخبهم قاعدين يكتبولو في دستورو و في مستقبلو و منظيّعوش حقّنا باش نبنيو تونس على قاعدة صحيحة